Sugnu venutu all'uottu de Natale
la notte chi nesciu nuostru Signure.

Sugnu venutu mu mi fai la strina,
fammi la strina cchi mi suoli fare.

Nunn'è vrigogna ca ciercu la strina
ca la strina la cercau nuestru Signure.

La strina si fa tri vote l'annu
u vattimu, Natale e Capudannu.

Fammi la strina e falla de dinari
pozza mu hai nu figghiolu Cardinale.

Fammi la strina e falla de prusutti
si nunn'hai nu curtieddru scoccamilli tutti.

Fammi la strina e falla de tornisi
pozza mu hai nu figghiu gran marchise.

Tantu potiti fare bone feste
quantu a Paliermu c'e su porte e furneste.

Tantu potiti fare de lu miegghiu vinu
quant'acqua curre Coraci pendinu.

Tantu potiti fare bonu ranu
quantu 'nde strude Cutru e Catanzaru.

Tantu potiti fare de la sita
quantu 'nde strude Napuli e Gaita.

Tantu potiti fare buoni jorni
quantu cc'è su ceramidi a sti cuntuorni.

Pue vene marzu e passanu l'acieddri
Dio benedice 'sti figghiuoli beddri.

Pue vene marzu e passanu li grue
benedicimu le vacche ccu lu vue.

A chista porta ccè sbatte la luna
Dio mu ccè manda na bona fortuna

A chista porta cc'è 'mpenduta na rita
prima de l'annu mu trase na zzita.

A chista porta cc'è 'mpendutu nu spitu
Prima de l'annu mu trase nu zitu.

A Micuzzu lu dassaru stare
cumu patrune ha de comandare.

A Francischina la dassaru stare
cumu patruna ha de cumandare.

Viju na luciceddra vascia vascia,
chistu è Totuzzu chi apera 'a cascia.

A na manu tena la lumera
all'atra 'na cannistra china.

Santa Nicola faccila affhiare
la chiaviceddra de li mustazzola.

Io nun vi ciercu, no, cientu ducati
sulu la porta pemmu m'aperiti.

Canta lu gaddru e scuotula le pinne
dunamu 'a bona notte e jamuninde.

De stu grubbu nesce na gatta
jamuninde ca la stina è fatta.