`Na fhimmìna canùsciu `i sta vinèlla
chi perdi tiampu di matìna a ssira
parràndu mo ccu chista mo ccu chilla.
I fhatti d'u paìsi `i sa tutti illa:
chini si spusa, chini s'ha dassàtu
e chini ha nisciùtu e ccumu hanu chiamàtu.
A sira quandu arriva llu maritu
nun trova llu mangiari priparàtu
e nemmenu a casa rigistràta,
a trova nt' e cuvèrti `mbulicàta
e si lamenta ca cci doli lla capu.
U povaracciu a cridi e lla cunzòla,
cci vo fhari nu ttè o `na gagumilla,
pua stancu `i `na jurnàta di fhatiga
si mangia ancuna cosa e ba a durmiri.
A giràndula, ch'è bella ripusàta,
pensa a tutti `i chiacchiari
c' ha fhattu nt' a jurnata
e un bidi l' ura mu veni dumani
mu po' parrari ccu autri cummari