Oji senza domani e senza ajeri,
mbernati longhi, morti nta la Spagna,
viscuvi, podesta', carabbinieri,
gnuri e baruni di lu "magna-magna".
Si curria cu lu vento di sciroccu
menzu a limuni e a pedi li livari.
Vennari santu: adduri i piscistoccu.
Subba li chjuppi si vidia lu mari.
Meluna e surba, mpisi a li barcuni,
traini m'pila tutta la nottata,
rifriscu d'acqua sutta a li vajuni.
adduri di restuccia mpumicata.
Mustu friscu, muschiji di parmentu,
umiti e gelu dintra li portuni,
nta li nottati di cucuja e ventu
tutti a la cupa sutta li pagghiuni.
Amuri, occhjati e vasi: chi scialata !
Chi gioventu' di zuccaru e velenu !
Uri, minuti ed anni: na volata,
finu a lu jornu chi partiu nu trenu. |
|
