Mi ‘ngrizzulanu i carni
si pianzu a quand'era guagliuni
e eco I'atobussu
jia a mmari
allu cafharuni.
E' beru ch'era picirillu
ma mi ricuardu,
ca c'era chino i sciarretti
e sempri luardu.
Ciucci,mula, pagliara,
cci nd'era a cintinara
e guagliunastri,
chi facianu amuri
ccu lla quatrara.
Nta chilli ciambri,
e sutta chilli sciarretti,
cci nd'era tundini e tavulinetti,
u mangiari, nta chilli jurnati,
si pirdia:
baccala', patati, fhazizza e suprissati,
annestra vrasoli capaccualli
e pasta inbainata,
e setta chillu friscu,
cull'arganettu e lla chitarra,
na cantata.
Tandu gabinetti un cci nd'era,
si no mali i panza
ti piava all'antrasata,
nta chilli sipali
ppi tutti c'era na jittata.
Chilla prajia prajia,
assai un ci nd'era
agenti ccu lla strajia,
proprio ancunu a pussidia,
chini no' supra arina
s'arrustia.
Quantu viacchji arragumati,
quantu giuvini arrussicati,
chi ccu papuli e chi malati,
ma tutti,
sopra arina stranghjiati.
Mpantasatu caminava,
u stili russiava,.
u cialu hicia,
u mari, n' uagliu paria,
e sutta chilli cannizzoli,
musica d'arganettu chitarra
e canzoni d'amori. |
ann'angulu,
sopra na seggia stranghiatu,
c'era n'uaminu,
mparu, raparti assittatu,
iu mu gustava,
echi panza sbillicata,
echi facci mbisucchjiata,
havia nu tapanaru
chi un llu putia,
mangiava vrasoli,
e di tuttu si fhuttia.
llà bicinu,
supra mi morgiu assittatu,
c'era mi giuvini,
chi du lampu paria sucatu,
si capiscia ca era ncamatu,
chillu mbuccava,
e llù giuvini guardava,
parica ppi dispiattu u facia,
chillu povaru guagliuni,
guardava, e mbacanti nducia.
Cumu u culu gruassu
si nda addunatu, ridiandu,ridiandu,
cci ha dumandatu..
bellu guagliu'
ha mangiatu?
gnorno' sugnu ncamatu !!!
hoo..povariallu!!!
e picchi' stai cumu nu mpantasatu,
va fatti u vagnu,
ca dopu, puru tu,
ti sianti sazziatu!!!
Cchi ngratu!!!
accussi' haiu pinsatu
e puru ch'era nu guagliuni,
a chillu viacchjiu,
cci vulia ncazzari nu ciampaluni.
E subitu mi vinni a menti,
nu dittu anticu,
chi dici chjiù di unu :
“u vurdu un cridi allu djiunu. |
