Ammutaru li vuci nte li strati:
’a morta, comu passa , ’on guarda mpaccia
e facia tutti quanti ’u vi pilati.
Stanotta vinna queta mu s’affaccia
e si cogghiu lu megghiu d’o paisa,
chi stendutu viditi nte sta vara
conzatu cu na povera cammisa:
amici, nci moriu Carnalivara!
Para ca fu nu sonnu e non nci criju;
ajeri tantu arzillu nte li strati
a lu paisa deza lu sbiriju
e mo nci renda affritti e scunzulati.
Carnalivara mio, pecchì fujisti,
non vidivi ca tuttu ti ridìa?
Non canuscisti mai li farmacisti
cà ti curavi nte la guccerìa.
Non canuscivi ’a faccia ’e l’esattora
e non avisti mai brutti penzeri.
’U sacciu vinna menu a tia lu cora,
ma non posasti ’u mangi nzinca a jeri.
Ti canuscivi ’e picciulu, mio caru,
quandu la mamma mi dicìa mu mangiu,
e mo chi sì’ stendutu paru paru
mi vena ’u mi disperu e pemmu ciangiu.
Mi davi tu la gioia nte la via
quandu passavi comu nu regnanta;
non canuscisti mai na malatìa
e non ti vinna a menta nu purganta.
Avivi ’a panza ch’era nu jardinu
duva nu porcu sanu nci capìa;
non si lagnava mai lu toi vicinu
cà de scorreggi mai non nda sentìa.
Eri tuttu sovranu e si sbentavi
mai puzza nci facisti tu hjarvara:
’a Travijata ducia nci sonavi
e lu cora sentìa lu recrijara .
|
Eri l’unicu re nte stu paisa:
nu professora fusti de pruppetta;
venianu tutti quanti a la mpalisa
mu pigghianu lezioni de forchetta.
Vinnaru deputati e senatori,
sindaci e presidenti d’a provincia;
vinnaru d’a Regiona l’assessori
e ognunu si mparau mu mangia e vincia.
L’allezionasti ’u sbaffanu a sbundeddhu,
nommu dassanu nenta nte la via,
scangiaru la naziona pe morzeddhu
e ’u parlamentu pe na trattoria.
’U megghiu ’e tutta quanta ’a cumpagnia,
è risaputu, fu don Carmelinu
chi facìa nt’a dispensa pulizia
cu don Ernestu nzema a tavulinu.
E tu quasi ncantatu li guardavi
e l’occhiu diventau quasi gilestru:
nt’o pettu tuttu quantu ti scialavi,
st’alunni superavanu ’u maestru !
Re de la panza, addio mò ti dicimu
nte chistu jornu chinu de dolura;
guarda comu la morta tua ciangimu,
guarda Bettuzza chi cangiau culura.
Non nda mangiamu cchiù carna silana:
nci tocca ’a fama nira supportara
cu na sarda salata e pocu pana,
cà ’a chiesa dicia “ aviti ’e dijunara”.
Io non vogghiu mu sentu stu languru
e mangiu comu tu solivi fara:
stanotta nu sozizzu mi procuru
e vegnu mu ti fazzu recrijara.
Ti fazzu pemmu senti lu profumu
de lu sozizzu chi pe tia fu vita;
ti fazzu ’u ti nda gurdi nte lu fumu
comu la mamma tua quandu fu zita.
Requie ti cantu, amicu, non penzara
si ncunu grida a tia “bruttu porcuna”;
fusti pe nui na lucia tantu cara
e cui non ti vo bena è nu minchiuna.
|
