A mio fratello, da molti, da troppi Natali lontano da casa sua
Bona sira, salute, signuri e signurine...
Fa friddu! Forse nivica! Ncignanu le catine
d'e sazizelle a pennere, cca' e lla', sse case case...
A tutte? Cumu a tutte? Ma no, cumu cce trase?...
Le varve varve!... Adduve chilli assettati mpari,
e nun su cumu patrimma, sempre chiumbu a dinari,
chi si vue nnu centesimu te fa certe guardate... ...
e murra le sacchette chi su sempre scigate!
Dunca la sazizella campia! Ma lassamula mpace
sinno' la canna zillica... Ed illa benedica
penna pecchi' ha de pennere! Ppe nue: Fisc-cu de pica.
Fa fridiciellu! E' tiempu! Dicia marru Saveru,
chi si nne ntenna, caspita! Si nne ntenna daveru:
<< Quannu Natale e' turvule, quannu jennaru e' siccu,
stamune tutti ngiubbilu, ca la massaru e' riccu! >>
E abbasta chi stau commeri Barracca e lu massaru,
nue ca crepamu e chiacchiera; lu munnu e sempre mparu!
Io nne tiegnu difise, luntane e casarule,
nn'haiu tra Sila e Vallu terre spase allu sule!
Orta, iardini, chiuse, ppu' ppu' quantu nne tiegnu!...
Fatturi ccu turrieri faru lu va ca viegnu!
Su forse mille tummini de terra siminata,
e, si l'annata ntruoppica, me dugnu nna spagnata!
Percio' quannu trovamu nna cropa de chiaria,
e la lanetta a pappice cce sta ppe fantasia,
<< Bravu, dicimu, minacce; s'inchiu li magazzina!...>>
E li jinocchia tremano e abballu li stentina!
Fra friddiciellu propriu: E' buonu, e' santu, e vale!
Ma, cangiamu discursu: Ppe ssu Santu Natale
ve siti preparati? E cumu no, ve pare!
Gia' illu e' tantu facile; mo, se po campare!
L'ova ti lle regalanu, li frutti vau ppe nterra;
vi', te cali e le cuogli! Vidi nnu serra serra
ntra li cafe': Renzelli, chill'anima pietusa,
duna li durci gratis! Daveru, ccu la scusa
de ssu Santu Natale, casce casce lle manna:
Cumu? Nun cce vo' cridere? E tu va l'addimmanna!
Li durci suli? Tuttu!... Li pisci a nna ciutia,
trasi ccu dui centesimi ntra nna salumeria!
Li vruocculi l'hai puru a nna lira lu mazzu...
Gia' illu mo li dinari se chiamu: Cchi nne fazzu!
Tu nun l'arrivi a frunere, hai voglia ca nne sciupi;
nne su chine le case, nne su chini li grupi!
Nun trovanu cchiu' postu, nun trovanu riciettu,
mo le banche te preganu ccu la petra a llu piettu!
E, si va de ssu passu, minutu ppe minutu,
fruna ca puru patrimma se trova dinarutu! |
