Cchi mi dissi Micúzzu!
'Un ndi cácciu e 'un mi nd'ammíantu,
cumu 'nu testamíantu
mi fhici 'stu discursu:
"Vi dugnu 'sta fhoturgafhía
ma 'un la pirdíti
e s'ancóra scrivíti
arricurdátivi 'i mia".
Cchi paróli binidítti,
l'haju scritti dintra 'u cori
e pinsári cha m"ha ditti
dua o tri misi prima mu mori!
E mó, dicítimi vua cchi púazzu fhári,
cci l'háju purmísu e ndi vúaglju parrári.
Chisá 'ntra quali "cascia" é arricittáta
'a vistitúra 'i Micúzzu ricamata!
'Nu campijunáriu 'i pezzi ammintáti,
longarini, rutúndi, a sbrínchju e quatráti.
'Un cci mancava nissúnu culúri,
jánchi, turchini, cilesti e scuri.
Cuttúni, lana, sita, 'na 'mbiscugliáta,
ndúvi l'avía accattáta?
L'avía a 'na vita, 'i qunad'era guagliúni,
'un c'era lla fhódara e mancu i buttúni.
'Nu tumátici arruzátu alla barrétta,
'na spíngula d'apparátu alla brachétta.
Micúzzu rróbi novi ndi tinía,
'i stipáva 'ntr"a cáscia.... e 'un s"í mintia.
Nd’ha ffattu diri missi allu patri e alla mammarèlla,
a ‘Ntoni cha c’era ffrati
e alla sùaru,cummàri Sabèlla.
Passàu lla vita quasi prigàandu,
fhòra e ‘ntr’’a gghjasa si jia ‘nginucchjàndu.
Erramu,scunsulàatu,abbùttu o dijùnu
Ma ‘unn ha circàtu mai nènti a nissùnu! |
|
