Mi ricordu tempu arretu,
Quand'on jia a lavorara,
Eru conzatu comu a San Petru,
Cca varva longa para para.

Mi ricordu i scarpi rutti,
I cammisi arrepezzati,
Ogne tantu a panza chjna ,
E pumadori assulicchjati.

Mi ricordu e non mi scordu,
Ch'eru orfanu , malatu,
Puru u Sindacu 'u sapìa,
Ch'eru puru disperatu.

Mi ricordu i fhjuri beddhi,
Lacqua d'o mara chjara, chjara,
I vichj stritti, stritti, stritti;
Cch’ on potivi caminara.

Mi ricordu e non mi scordu,
E na perzuna tantu cara,
Iddha sì comu na mamma
T ‘accugghja senza parrara.

E quando ncuna vota
Eu ppe casu cci passava,
A casa tutta iddha aprìa
Perzinu a tavula e mangiara

Ma on è ca vogghiu dira,
Ca iddha è tuttu bonu stara,
Puru iddha tira a vita,
Puru iddha tira a campara.

- Mi ricordu e non mi scordu;
L'amicu riccu 'e guagliuneddhu:
- <<Mimmù, Mimmù t'i perdisti!>>
Mi dicìa tempu arretu".

<<Veni e trovami a la casa,
Pecchì poi t'ajiu 'e parrara,
Cosi bboni t'ajiu 'e dira
Cc'e 'a speranza 'e faticara>>.

<< Veni e trovami a la casa
Ca dopu t'ajiu 'e parrara,
<< Veni mangia, mangia abbuttati,
Ca doppu 'a terra m'ai 'e zappara>>.

Ed' eu comu 'nu cunnu
Eu mangiava e m'abbuttava,
Ma doppu cch'eu zappava
Puru 'a catarra avìa sonara.

<< Mastru Mimmu!... Mastru Mimmu !...
'Na canzuna tu m'ai e fara !...
Soni bonu!..cchi beddhizza !...
Mo ti fazzu recrijiara !>>....

<< Mo ti chiamu tanti genti,
Baruni, Conti, Autorità
Ma cci soni n'atra ura,
E ma vidimu comu si stà>>.

<<Tantu mala 'on pò jira
Tu soni bbonu e ti diverti
Tantu tu, duva cazzu e jira?
Senza fatica, senza 'na lira?>>

Mi ricordu e non mi scordu
E cu' fa bbena e non fa mala,
Sartu anticu, vecchju, bbonu,
Iddhu tampra ‘u misala.

T’accumpagna ‘i canzuni,
Ccu chitarra e mandolinu,
Ccu l'attriosi on va d'accordu,
Ma va bbonu ccu 'u vinu;

Sona bbonu sona cuntentu
Ormai sta vita ava ‘e passara,
A gugghja l'usa comu strumentu,
Ma tira avanti ma po campara.

Mi ricordu e on mi scordu ,
Quando bussàu a la porta mia,
Nu guagliuna cc'u u patra ,
Ma cci sonu l'Aveo Maria;
Iddhu è picculu ma tantu randa,
Iddhu no sapa, iddhu on ci arriva,
Iddhu mi deza a forza ma campu ,
Iddhu mi deza a forza cchju viva:

Jia e venìa quand’era malatu,
Cchi piatti nte mani , ‘u mangiara conzatu
No ficia nessunu de parenti cchju cari
Mo ficia u guagliuna cu cora all’altari.

Mi ricordu e ‘on mi scordu,
D'e panni amprati da casa mia,
D'e rosi russi supra ‘u barcuna,

<<D'o maccatura jiancu da mamma mia.>>

Milano 1987