Ed eccuvi a Brunu, 'na vota craparu,
Figghju 'e 'ntonareddhu 'i crapi criscìa,
Ccu 'nu vastuna a lu monacaru,
Pecuri e crapi t'i ricogghja.

'E nomu <<Brunu >>vinna chiamatu,
'U salutaunu 'i ciucci ragghjandu nt'o pratu,
Tutti 'i cani nci vattianu 'a cuda,
Perdiu 'u patra, peccatu!.. mo suda!…

Va tuttu l'annu vestutu 'e mbernu,
Cogghjendu busti a menzu 'sti strati,
P'a genta s'omu para 'nu 'mpernu,
'U chjama, 'u nzurta e nci tira petrati.

Ed 'eu ogne tantu scindendu d'e scali,
Chiddhi cchi vannu a la casa mia,
Vidìa guagliuni ccu pali nt'e mani,
Assecutara a Brunu cchi mala 'on facìa.

Sta murra e guagliuni ccu pali nte mani
Nci jia arretu sputtendu chist ’omu
U sputava ccu sdegnu ccu tanta schifezza
Nta faccia gridando j’è j’è <<cchi bellezza ! >>

Mò 'sti guagliuni cca si docaru,
Nc'i misuru tempu cchjù iddhi ca Brunu;
Mò tu rispettunu 'stu pecuraru,
Cchi mala 'on fa, 'on 'mbida nessunu.

'A genta t'u chiama: <<J'è j'è ! j'è j'èe!>>
Iddhu respunda :<<Mamma ttù, mamma j'èe!>>
Doppu ncazatu si senta sputtutu,
E fujia luntanu ppe' nomma è bidutu.

Macari s'ammuccia p'o friddu d' notta,
'Ntra chiesa cc'u Santu ma 'u po' proteggira;
'U vitti eu, Rosàaaa ! A la Vaddhotta !…
A li pedi d'o Santu puru ciangìra.

Chissu è <<j'è j'è>>, 'e nomu Brunu;
Hava l'occhj d'o spirdu 'on fa mala a nessunu,
Camina sulu a 'menzu 'sti strati;

<<A mmia cari ggenti, cchi giudizziu mi dati?>>