U vinu e' sule,
desideriu e state;
a culure i sangu
calure i terra
cumu vracia appicciata;
cumpagnia,
cristallu vilatu
d'ure passate:
viecchi fatti,
faccie luntane ca rividi,
tra nu bicchieru
e n'atru c'ha vutatu
Ah!... u vinu!
Cristallu ammantatu
i silenziu,
amuri passati,
umbre chine i tiempu,
ca ti passanu ppa mente,
dopu buttiglie c'ha sculatu.
Ah!... u vinu!
Voglia i rimana sulu,
i fuire sta vita!
Ppi rista' cchiu' sulu!
Ah!... u vinu!
Paci, puru... morte,
mazzati, puru... chiantu,
canzune stunate,
puru curtiddrate!
Ah!... u vinu!
Desideriu i vita... alligria:
quannu i bucali
su cchini
e priestu rivacati,
na cursa, na cursa a r'alligria.
|
Fra stritti i manu,
balli, vasi;
na tuccata fra ranni, fra guagliuni;
marzucche, tarantelle fra' viecchi e vecchiaredde
e sapissi cchi risati e vattimani,
quannu ad ancunu li zumpa la dintiera.
Ah!... u vinu!
Cumpagnu i chini vvo' fuire nu passatu!
Ca biva e cchiu' vorra bbivere!
E... nunn'e' mai stunatu!
Ppi iddru mai e' rignata alligria,
ma sulu raggia,
i quannu a furtuna
nu iuornu l'ha la chiantatu.
Dumani cumu oi,
oi cumu ieri;
cussi', tira avanti stu dannatu!
Dannatu... finu a morte!
E... nunn'e' mai stunatu!
U vinu nun ha curpa
a curpa... e' du passatu.
|
